طبعا انا استغرب من شخص متخصص علم اجتماع وجامع المسيار مع زواجات مدري من وين جايبها 

 

وكان الوضع اوكي وكلامه مقنع لكن يوم شفت مقاله عن المسيار عرفت انه يجهل امور كثيره وانه يتكلم وهو موب فاهم 

 

والا كاتب بهالوقت المفروض يصير يعرف للنت ويبحث بالفتاوي ويتأكد من الموضوع مايمشي على عماه ويفسر من راسه

 

طبعا المسيار اخذ اكبر من حجمه وبكثير و

 

دايما اشوف ناس تنتقد زواج المسيار بالانتر نت والتلفزيون والجرايد ولاألقى احد يرد عليهم 

 

لا مشايخ ولا متخصصين 

 

طبعا الرابط بين هالاشخاص الي ينتقدون هالزواج جهلهم الواضح بالدين وعدم احترامهم لفتاوي العلماء 

 

ياخوي اذا عندك موضوع زي زواج المسيار او غيره ادخل قوقل واقرى عن الموضوع وافهمه وشف وش طريقته 

 

وادخل مواقع المشايخ وابحث بالفتاوي واغلبهم يشرح ويفصل 

 

شفني انا ووجهي داخل موقع الشيخ ابن باز وابن عثيمين

 

قوقل يقول لي تأكد يابو اخاف انك تبي موقع طرب وغلطان 

 

وبعدين احكم موب تجي مطفي النور ومع الخيل ياشقرااا 

 

موب تصير زي كتابنا هاليومين شخمط من راسك والجرايد تنشر لك

 

الناس سبوا سبيت معهم

 

مره بالتلفزيون السعودي جايبين مقابله مع حرمه ويسألونها عن رأيها بزواج المسيار

 

تقول هذا شي غلط واطلب من المشايخ يتراجعوا عن الفتوى هذي !!! 

 

شوفوا الوقاحه على الدين وين واصله 

 

يعني الحكم ماجاز لها ولا ناسب طموحها لازم يتغير

 

الي يشوفها يقول المشايخ جايبين الحكم من جيوبهم والا من روسهم او انه يباع بالبقاله ومادرينا عنه

 

وطبعا ماينتقد هالزواج الا المتزوجات لانهم يخافون من هالشي على ازواجهم 

 

يحق لكم تخافون ماقلنا لا لكن اذا زوجك ناوي يخربها بيطق الثانيه فوق راسك ولا فكر فيك 

 

اما اذا كان دجاجه ويخاف منك اذا كفشتيه متزوج مسيار امصعي اذنه وبالجزمه على وجهه لانه موب كفو يصير رجال

 

...... 

 

وعشان ماكثر حكي 

 

دخلت موقع الشيخ ابن باز الله يرحمه وبحثت عن الفتوى لقيت جوابه يقول بما معناه انصح الانسان بالزواج العادي المعروف 

 

وماقال حرام المسيار ولا حلال 

 

وأنا اجزم جزم لو فيه واحد بالميه تحريم كان قالها الشيخ الله يرحمه 

 

واعتقد انه مايبي يفتح مجال للعب واللف والدوران 

 

والشيخ ابن بازالله يرحمه معروف انه يعطي كاش ومايجامل احد

 

والشيخ ابن عثيمين الله يرحمه مالقيت بموقعه فتوى بهالموضوع لكن فيه المشايخ حللوه ولهم اسبابهم القويه 

 

... 

 

اولااا الي يشككون بزواج المسيار ويشبهونه بالزواجات الاخرى 

 

زواج المسيار زواج رسمي مثبت بالمحكمه ولا هو مربوط بوقت ولا مكان 

 

والزوجه تضاف بدفتر العائله وكل شي طبيعي

 

وفيه شروط الزواج الي هي الطلب والقبول وطبعا بعلم اهلها 

 

ولو الزوج بغى يطلق لازم يروح المحكمه وينهي الاجراءات زي الزواج العادي

 

لكن الفرق فيه ان الزوج او الزوجه يتنازل عن بعض الاشياء 

 

وهالتنازل ممكن يكون لتسهيل الامور بزواجه او لظروفه الخاصه 

 

مثلااا 

 

انسانه مدرسه او طبيبه وعندها عيال وبيت وفلوس 

 

تقول انا مابي منك سكن ولا مصاريف او ماتبي اولاد وهالشي متنازله عنه ويكفيها عيالها وهو يكفونه عياله 

 

والزوج مثلا يقول انا ماأبي احد يدري عن هالزواج من اقاربي بالوقت الحالي او للأبد 

 

وهذا انا اعتبره خوف او جبن من الرجل 

 

 

 

جبن والا عسسل لوووول 

 

 

 

<<< ياصبر الارض 

 

وبعدين اغلب البنات الي يتزوجون مسيار مطلقات عندهم اولاد وهالشي بالنسبه لهم كافي 

 

ويبون يربون عيالهم ويهتمون فيهم وبنفس الوقت يبون رجال حولهم ومن حقهم يعيشون حياتهم

 

المهم هالشرطين الي( ماأبي عيال او ماأبي احد يدري )الناس شابين فيها ومخلين زواج المسيار جريمه شروط غبيه لكن ماتقدر تحرم الزواج بسببها

 

الزواج العادي يحق للزوج او الزوجه تشترط والمسيار عيب يشترطون؟؟

 

ومثل منتم عارفين كل زواجاتنا الشرط الاساسي اكمل دراستي 

 

ولا أحد جلدها على هالشرط

 

وبحالة الوفاة الزوجه هذي تورث زيها زي غيرها 

 

تجيب دفتر العائله وتدبسه بجبهة الحرمه الاولى وتقول لها انا وانتي بالهوا سوا ياأم الشباب

 

.... 

 

انا اعرف واحد من الشباب امه مطلقه وهالولد كبري تقريبا وعنده اخوان اصغر منه 

 

وماشالله امها يخطبونها الناس وتوها صغيره بس عندها عيال ومرتبطه فيهم ولا تبي تتركهم 

 

الزبده جاها رجال وقال ابيك مسيار الحين اجلسي عند عيالك ومتى ماكبروا وتزوجوا وكلن انشغل بنفسه تجين عندي 

 

والحين اجيك كل اسبوع ايام معينه وفي بيتك لو تبين وانتي زوجتي على سنة الله ورسوله 

 

وافقوا عيالها وتزوجت وماشي حالها والرجال يجيهم بالبيت ويجلس معهم وكل شي طبيعي 

 

هالزواج موب ازين لها من قعدتها كذاا وهي صغيره ؟ 

 

وهالرجال الي فيه طاقه ومعطيه الله عافيه يتزوج بالحلال ازين من انه يطرد بنات خلق الله بالاسواق 

 

وانتم تشوفون بالاسواق شياب كبر جدي صابغين الشنب ويلاحقون البنات 

 

هذا موب يستر على شيبه ويتزوج كان حرمته ماتكفيه احسن من يشوفونه العالم وهو بهالشكل ؟ ؟ 

 

.... 

 

واحد من الشباب توه صغير وخاطب بنت عمه وأمها مريضه واخوانها كل واحد بديره وهي قايمه بأمها بشكل اساسي 

 

قالت له زواج مسيار الين امي تتحسن او (تجيب العيد وتموت لوووول 

 

وبعدين انتقل معك لبيتك او تنتظر الفتره الجايه الين توضح الامور 

 

قال لا بتزوج وتزوجها مسيار ويجيها ببيتهم بشكل شبه يومي 

 

الين جابت امها العيد وتوفت وراحت البنت لبيت زوجها ولا كأن شي صار 

 

..... 

 

تقولون لي فيه ناس يستغلون هالزواج اقول لك كلام صحيح لكن مو معناها يحرم هالزواج او يقارن بزواج الواحد ينام مع البنت ومن بكره يحط شماغه على كتفه ويمشي لبيتهم وبنت الناس تضف اغراضها وترجع للبيت ونسميه زواج ويك اند 

 

هذاا اسمه ديت بعينه وعلمه ومدري كان الكاتب مايعرف وش معني ديت 

 

يجيني اشرح له بالصوت والصوره لانه واضح انه شايب وخبره قديم ايام الغزل على الثابت او البراقع والعبايه الي تحت الابط 

 

اقول للكاتب كانك تخبر لي وحده زواج ويك اند الله لا يهينك عطنا رقمها ترى هالعرس موب شين ابد لوووووول 

 

قال ايش قال زواج ويك اند ههههههههههههههههههههههههه